31a Rassegna dal Teatri Furlan - Voleson 8-15-22-29 Novembar

In cheste edizion, che e tache il 8 di Novembar e continue il 15-22 e 29, il Circul Culturâl Erasmo di Valvason al à il plasè di presentâ al public dôs Compagnijes teatrâi che no si son mai esibidis a Voleson.  Cun lôr si tache e si siere la Rassegne, si trate di "La pipinate" di Sclaunic e "Buine Blave" di ...Mortean.

Ta prime serade la compagnie teatrâl, che e fâs part dal Circul Culturâl e Ricreatîf “La pipinate”, e puartarà la comedie brilante “Mi tocje ancje paià las tasses” gjavade fûr dal test par talian di Roberto Fera e voltade par furlan da Maura Coppino e regjie di Giuseppe Serafini; il grop al è atîf dal 1980 e in ocasion de Rassegne teatrâl di Listize al propon ogni an une gnove rapresentazion teatrâl.

Il 15 di Novembar e sarà la volte dal Grop Art Filodramatica“Quintino Ronchi” di San Denêl, la compagnie e à une lungje tradizion teatrâl cun origjinis fin dal 1967 e in chest mieç secul di vite e à metût in sene almancul une cincuantine di oparis, dutis par furlan, cun spetacui tant che in Friûl che in cetantis citâts talianis e forestis. Il test de comedie in trê ats “Fûr stagjon” al è stât scrit da Michela Romanello, component da stesse Compagnie e la regjie a è di Gianfranco Milillo.

Si larà indenant il 22 di Novembar cun la Compagnie Teatrâl“Clâr di lune” di Bertiûl e la comedie “Sespis”, il test al è par cure de compagnie e cun la regjie di Loredana Fabbro. Come in ogni comedie ancje in chest test e saltin fûr une cierte morâl e cualchi riflession; in chest câs un barbe benestant e vedran al vûl meti ae prove lis gnecis sul pericul di pierdi la ereditât, framieç colps di sene, personaçs inspietâts e progjets a sorprese si scuvierzarà che no simpri dut al è come ch'al pues someâ.

In conclusion de Rassegne, organizade in colaborazion de Associazion Teatrâl Furlane, che met adun la plui part des compagniis teatrâi amatoriâi de nestre Regjon, te serade dal 29 di Novembar la Compagnie “Buine Blave” che non podeve che rivà di Mortean, e presentarà a Voleson une comedie di Gianni Gregoricchio, comediograf furlan che nus â lassâts tal 2007 e che traviers i siei scrits in lenghe furlane al à simpri savût rivâ tal cûr de int ancje su dificii temis sociâi. Il spetacul dal titul “Alde dai fruts”, al conte la storie di un personaçs intens e dramatics, Alde. che e je tal stes timp candide te so semplicitât e tal so amôr pe vite, ma ancje passionâl, leade ai valôrs di cheste tiere come la cjase, il fogolâr, la contentece des ridadis dai fruts.

Ducj i spetacui e saran li da l'Auditorium des Scuelis Mezanis di Voleson as 8.30 sot sere.-