Magjis te gnot di San Zuan

Magjis te gnot di San Zuan

Il solstizi d'istât al figure il moment plui alt, l'apogeu dal soreli come pont astronomic e astrologjic di grande liberazion di energjiis cosmichis.

I solstizis d'istât e d'unvier a son doi grancj moments di saldadure de ruede dal an e ancje i ponts plui fuarts dal cicli esoteric e magjic cuant che si metin in mot particolârs dinamichis di fuarcis negativis e positivis.

Come la gnot dal 24 di dicembar, cussì chê dal 24 di jugn e je speciâl par vie che a sucedin robis grandis e striaments. Al contrari di ce che al sucêt te gnot de nassite di Nestri Signôr - cuant che e nas la lûs dal "soreli gnûf " cul solstizi d'unvier - inte gnot de nassite di Sant Zuan - cuant che al nas il scûr dal "soreli vieri" cul solstizi d'istât - a son lis fuarcis negativis a slargjâ la lôr influence. Vie pe gnot (puartade al 24 di jugn, par "analogjie cronosimboliche e liturgjiche" cul Nadâl) lis striis si dan cunvigne intal grant "sabba" dulâ che, denant di Satane, si bandonin a ogni sorte di perversion e di profanazion.

Ve che, in chest periodi, une volte la int e inmaneave une schirie di pratichis superstiziosis di difese cuintri dai demonis, des striis e dai strions; e meteve denant de puarte de cjase ulîf benedît, orâr, zanevre, artemisie e altris plantis cul podê di slontanâ lis inicuitâts e chei che si cjatavin par strade a tignivin sot de cjamese un mac di jerbis di San Zuan cun rude, ai, sinç e altri robis sacralizadis come lis rosis cjapadis sù daûr de procession dal Corpus Domini. Di seculorums l'om european al à celebrât rituâi di aghe e di fûc intant dai solstizis cun fins propiziatoris e divinatoris.

Cui no si ricuardie cuant che si meteve il blanc dal ûf te gnot di San Zuan intune butilie di aghe e inte buinore dopo lis fantatis a cirivin di indivinâ dai fîi dal ûf il mistîr dal om che a varessin maridât?

Chest esperiment si lu faseve ancje cul plomp fondût. In cierts paîs cheste pratiche si le faseve inte gnot di San Pieri par viodi se il blanc al cumbinave une barcje. Altris pratichis di superstizion a jerin fatis cun favis, cun fasui metûts sot dal cussin e cuntune çavate butade a câs dal alt di une scjale. Pe fieste di San Zuan e jere ancje usance di leâ un arbul sei par prudelâ la fertilitât, sei par slontanâ de piante malatiis e maleficis. Daûr di une crodince antigone, inte gnot di San Zuan (cuant che i contadins a crodevin che il most al vignìs jû inte ue) il cîl al fâs colâ une rosade cun efiets straordenaris; cussì, une volte, lis feminis si rodolavin crotis o cu lis cotulis alçadis su la jerbe bagnade a fin di fertilitât, si lavavin la muse par slontanâ malatiis de piel, a racueievin flôrs e jerbis (macs di San Zuan) che dopo a vignivin puartâts in sen o picjâts intes cjasis o brusâts intes croseris par sprolungjâ l'efiet lustrâl e protetîf e par tignî lontanis maludizions e striaments. Si fasevin ancje rituâi di fûc: si impiavin grums di ramaçs e medis, si rodolavin ruedis invuluçadis cun manei di paie impiade, si tiravin lis cidulis. Chestis pratichis e vevin tantis funzions come che di da sostegn al soreli che tal critic moment solstiziâl al scomencave a lâ jû inviers il firmament austrâl, o pûr che di fâ fieste pal soreli inte manifestazion dal so plui alt sflandôr.

Cheste vielonone date e marche cemût che e jere tant cognossude e la sô sprolungjade tradizion fintremai in dî di vuê e rive a mantegni ancjemô cheste magjie de gnot di San Zuan.

Il Ponte, 6/2003 Gotart Mitri

(rangjât daûr di "II Friûl mês par mês" di M. Martinis)